Raqobatni rivojlantirish va iste'molchilar huquqlarini himoya qilish qo'mitasi O'zagroinspeksiya bilan hamkorlikda birja orqali bug'doy xarid qilgan un ishlab chiqaruvchilarni xatlovdan o'tkazdi.
Tekshiruv davomida korxonalarning ishlab chiqarish quvvati, donni qayta ishlash hajmi, saqlash omborlari holati, shuningdek, muvofiqlik sertifikati va sanitariya-epidemiologiya xulosalari mavjudligi o'rganildi. Natijada O'zbekistondagi 301 ta un ishlab chiqaruvchi subyektdan 127 tasining belgilangan talablarga mutlaqo javob bermasligi ma'lum bo'ldi.
Ularning 49 tasi o'z ishlab chiqarish quvvatiga ega bo'lmay, buyurtmachi xomashyosini qayta ishlash asosida ishlasa, 22 tasi vaqtincha faoliyat yuritmayapti, 6 tasining ishi esa butunlay to'xtatilgan. Yana 42 ta korxonada muvofiqlik sertifikati, 8 tasida esa sanitariya xulosasi mavjud emasligi aniqlandi.
