AQSh prezidenti Donald Tramp Vashington Grenlandiya xavfsizligi ustidan "doimiy nazorat" o'rnatishni ko'zda tutuvchi bekor qilinmaydigan bitim tuzganini ma'lum qildi. Nyu-Yorkdagi BMT Bosh Assambleyasi doirasida seshanba kuni AQSh, Daniya va Grenlandiya o'rtasida imzolanadigan hujjatga ko'ra, AQShning yozma ruxsatisiz hech bir raqib davlat orolda harbiy baza qurishi, harbiylarini joylashtirishi yoki investitsiya kiritishi mumkin emas. Trampning ta'kidlashicha, ushbu kelishuv Amerika byudjeti uchun mutlaqo bepul tushadi va 100 yillik strategik muammoni hal qiladi.
Daniya tashqi ishlar vaziri Lars Lokke Rasmussen kelishuv Arktika xavfsizligini nafaqat AQSh va Daniya, balki keng qamrovda NATO nazorati ostiga o'tkazishini ta'kidladi. Mazkur hujjat Trampning Grenlandiyani sotib olish bo'yicha uzoq muddatli bosimlari va yanvar oyidagi diplomatik inqirozdan so'ng ishlab chiqildi.
AQShning orolga strategik qiziqishi Ikkinchi jahon urushiga borib taqaladi. 1946-yilda prezident Garri Trumen orolni 100 million dollar sof oltinga sotib olishga uringan, biroq Kopengagen buni rad etgan edi. Sovuq urush yillarida AQSh u yerda 17 ta obyekt va 10 ming harbiy saqlagan bo'lsa, bugungi kunda faqat Pituffik kosmik bazasida 150 harbiy xizmatchi qolgan. NATO rahbariyati mintaqada xavfsizlik va barqarorlikni ta'minlovchi ushbu kelishuvni rasman qutladi. Grenlandiya muxolifati vakillari ham loyiha bilan tanishib, xavotirga o'rin yo'qligini va orol suvereniteti hurmat qilinishini tasdiqladi.
