TOSHKENT — Bosh prokuratura huzuridagi Departament ma'lumotlariga ko‘ra, Toshkent shahridagi tijorat banklaridan birining mas'ul shaxslari yirik miqdordagi mablag‘larni talon-toroj qilishda gumonlanmoqda.
Dastlabki o‘rganishlar natijasida, bank xodimlari fuqaro I.M. nomidan qalbaki ariza va boshqa rasmiy hujjatlarni tayyorlab, uning hisobidagi 500 ming AQSh dollari miqdoridagi omonatning 300 ming dollarini o‘zlashtirgani ma'lum bo'ldi.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) hamda 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish) bilan jinoyat ishi qo‘zg‘atildi. Hozirda tergov harakatlari olib borilmoqda.
